سيب البلد

إذا الشعب يوما أراد الحياة

فلازم يقرر يسيب البلد

حقه إنه يحلم يفكر يعيش

بس احنا لازم نخف العدد

عشان ابن عز يبيع الحديد

وصاحب الجلالة يبيع البلد

ومين اللي قال إن ممكن يعيش

ومين اللي يحلف بإنه اتولد

كان فيه شعب طيب عبيط

كان حد قال انه إبن البلد

ويقدر يفكر يقرر لنفسه

وياكل ويشرب في عز ورغد

جابو له العصاية قوام أدبوه

وغنوا ورقصوا عشان يتخمد

ياشعبي يانايم ياساكت ياصايم

ولا مرة فكر فيوم يعترض

ياهايم ياعايم في بحر الهزايم

وتسمع خطابي بصبر وجلد

هتسمع كلامي هتضحك وتبكي

وتغضب وتزعل تموت م النكد

سيبتك تنكت بمرضي وموتي

عشان تفتكرني هروح بجد

أنا مش هسيبك لأني نصيبك

هتهرب هجيبك وراك للأبد

لاابني ولاابنك هيقعد مكاني

واحفظ مكانك ليوم تنطرد

ولو مرة تحلم تفكر تعيش

لملم عيالك وسيبلي البلد

***

لن تموت

الموت في بلادنا فقير

لا يدخل قصر الأمير

قد يسكن بيت الغفير

أو ينزل عند الوزير

فإن جاوز الحد مات

***

والموت في قصصنا بطل

لا يكل عن العمل

ولا يبالي بمن حمل

فإن حضر الأمير بطل

***

وتراه في أشعارنا أمل

ندعو به بلا وجل

ولا نجاب على عجل

ولا نحال إلي أجل

***

وهو في دستورنا يموت

والوقت أبدا لا يفوت

والشعب لا يملك إلا السكوت

في المقابر والبيوت

يتلوا قوانين الثبات

***

والعدل في أوطاننا وباء

فكل شيء عندنا سواء

ليلنا كنهارنا في صيف أو شتاء

والتحالف بيننا مثله مثل العداء

لا تميز أرضنا بين السيول أوالدماء

ولا فرق بيننا بين المواطن والرفات

***

يامن سلبت الشعب قوت

وحاصرت بالخوف البيوت

ءالآن تحلم أن تموت

لا وربي لن تموت

يكفيك أن الشعب مات

طراطير ياواد طراطير

قلنا هنبني وأدي احنا بنينا جدار العار

يا استعمار بنيناه بإيدينا جدار العار

وأما شتمتوا نبينا شتمنا

ولما شتمنا قومنا شتمنا إيران

ولما ضربتوا إخواتنا ف غزة

قومنا بعزة عملنا زفة زار

بس الزفة قلبت حفلة لفك حصار

مالاقوش فكة قالوا ع البركة

انشالله يموتوا

فيها إيه يعني لو يتحرقوا بالفوسفور

ماحنا كمان راح نولع بكرة

لما هيجي علينا الدور

خلي الزحمة تخف ياعالم

حتى الميه عليها طابور

شوفوا خرايطنا فيها كام خط

وشوفوا عليهم كام طرطور

وكام واحد عايش تحت الأرض

بيحلم إنه يشوف النور

وبيشكر نعمة ربه

ويبوس بوز الطرطور

ولو قام يوم واحد مجنون مخمور

يهتف باسم الشعب يموت ملعون

على كل شاشات العرض

ويبقى من الكفار

والمفتي هيهدر دمه بعد مامات وارتاح

واللي هيسأل عن مشكلته هيبقى حمار

شكرا طراطير العالم لو غطيته الراس

عمر الطرطور مايداري العورة

ولا يحمي من الأخطار

لكن طراطيرنا بترقص وتغني علينا

وممكن لو حبينا قباحة

تسب إيران

محدش فاهم حاجة

سعادة الباشا نازل فحت

خايف م اللي بيجي من تحت

وبيني وبينه باب مقفول

لا أقدر أعدي ولا أقدر أنط

***

قلت ياباشا افتح لي الباب

أنا لا حرامي ولا نصاب

إيه لازمتها أنط السور

وانت فاتحها للأغراب

***

أنا مش فاهم حاجه يابيه

لو تفتح لي هتخسر إيه

ولو بتقول مش عارف تفتح

لما أنط بتزعل ليه

***

يعني مأمن للسفاح

داخل فيها بدون مفتاح

هو يقابلك باستكبار

وانت تقابله بالأفراح

***

خايف مني أنا ع الشعب

وانت بتنزل فيهم ضرب

طب إيه رأيك لو نسألهم

مين فينا نازل كدب ونهب

***

إحفر بس هتحفر قبرك

بكرة الشعب هيفهم غدرك

وانك بعت زمان ببلاش

وان البيعة الجاية لإبنك

***